1.) Mir müaßn jå heut nu ins Biri gehn,
rührt si koa Wind is da Himmü sche’,
die Mäuern san a so sche’ hell und klår,
schena wird’s neama des Jåhr.
[: Gamserl gibt’s nåch da Wåhl, heut gråds uns
g’wiß amål,
sechs und siebn san nit z’vül, wånn `sis toan
wü’.(will):]
2.) I steig vorån, steigts ma nåcha sche’,
seids nit går z’laut, låßt’s koan Stoa nit gehn,
wånn ma dånn drobn auf da Ploacka san,
oft zoag i enk(euch) enkari Stand’.
[:I pirsch ums Kogerl gschwind, då håms mi nit in
Wind,
i treib’ enks ålle gwiß, her über d’Ries’.:]
3.) Schützen, dås såg i enk ålln mitsåmm’,
schiaßts ma koa Goaß mit an Kitzerl zåmm’,
de Vorgeher, de låßts ma a in Ruah,
sunst gehngan uns de åndern nit zua.
[:Åber de åltn Böck, schiaßts ma mit Guster weg,
a *goiti Goaß* a wånns is, schiaßts oba gwiß.:]
(* unfruchtbare Geiß*)
4.) Ålls is so stü’(still) wia die ewig’ Ruah,
nur da Sennarin ihr Glocknkuah,
hert ma gånz stad von da Ålma drunt,
so san ma gståndn drei Stund.
[: Hiazt hebts zan stoanln ån, fliagt schon da Staub
davon,
hiazt kemman Gamserl gwiß, her über d’Ries’.:]
5.) D’Schützn stehn då mitn g’spånntn Håhn,
legt schon a jeda sein Stutzerl ån,
i woas’s nit wiavül’s Schuß håmbt gmåcht,
dümmelt håts wia in a Schlåcht.
[:D’Jaga san a glei då, schaun auf da Schußstått nå,
ob a koa Kitzgoas liegt, heit håt’s uns glückt.:]
6.) Schützen wia werdn mir de Gams jetzt kriagn,
oan miaß ma går mit an Sål(Seil) ausziagn,
er hängt jå gånz tiaf in de Mäuern drinn,
es kånn jå koa oanziger hin.
[:Åber bringts na de Åndern zsåmm, weil ma na
sovül håbn,
es lebe hoch und frei, de Gamsjagarei.:]